“ລູກນໍ້າ” ເປັນສື່ກາງຊ່ວຍເຫຼືອ ສ້ອມແປງຫ້ອງຮຽນ ໃຫ້ນ້ອງນ້ອຍຢູ່ເມືອງປາກງື່ມ

ລູກນໍ້າ – ທິດາລັດ ວົງສິລິ ເປັນສື່ກາງລະດົມທຶນ ຊ່ວຍສ້ອມແປງຫ້ອງຮຽນໃຫ້ແກ່ນ້ອງໆນັກຮຽນຢູ່ທີ່ໂຮງຮຽນປະຖົມບ້ານໂພນຂາມ ເມືອງປາກງື່ມ ນະຄອນຫຼວງວຽງຈັນ ຫຼັງພົບວ່າຫ້ອງຮຽນບໍ່ມີຝາແອ້ມ ສ້າງຄວາມລຳບາກໃຫ້ແກ່ການຮຽນການສອນໃນເມື່ອສະພາບອາກາດບໍ່ດີ

ລູກນໍ້າ ໄດ້ໂພສຂໍ້ຄວາມເລົ່າເລື່ອງລາວ ແລະ ເປີດລະດົມທຶນເມື່ອບໍ່ດົນມານີ້ຜ່ານທາງອິນສະຕາແກຣມຂອງນາງເອງ ໂດຍລະບຸວ່າ “ສະບາຍດີ ມື້ນີ້ນ້ຳຕ້ອງການຄວາມຊ່ວຍເຫຼືອຈາກທຸກຄົນ ເນື່ອງຈາກວ່ານ້ຳໄປເຈິໂຮງຮຽນປະຖົມ ໂພນຂາມ ເມືອງປາກງື່ມ ນະຄອນຫຼວງ ເຊິ່ງເພິ່ນບໍ່ມີຫ້ອງຮຽນໄດ້ເອົາສັງກະສີມາກັ້ນໄວ້ຊື່ໆ ເຊິ່ງກໍລຳບາກກັນຫຼາຍທັ້ງຍາມຝົນຕົກກໍບໍ່ສາມາດຮຽນໄດ້ ຫ້ອງຮຽນບໍ່ພໍແນ່

ໄດ້ຄິດໄລ່ຄ່າໃຊ້ຈ່າຍຕ່າງໆລົງໃນຮູບນີ້ ຫຼື ໃຜຢາກຂໍຂໍ້ມູນເພິ່ມຕື່ມກໍສາມາດສົ່ງມາຂໍໄດ້. ຖ້າບໍ່ຢາກບໍລິຈາກເປັນເງິນກໍເປັນເຄື່ອງວັດສະດຸກໍໄດ້ເດີ ເຮົາຮັບໝົດ. ໂຕໂຮງຮຽນນີ້ນ້ຳຈະເປັນຄົນດູແລທັງໝົດ ຈະກໍ່ສ້າງຈົນແລ້ວ ແຕ່ຍັງຂາດແຕ່ທຶນທີ່ຈະມາເຮັດ. ຂອບໃຈຜູ້ມີໃຈສັດທາ ທີ່ຊ່ວຍທຸກໆຄົນ ບໍ່ວ່າຈະເປັນຊ່ວຍແຊ ຫຼື ຊ່ວຍຫຍັງກໍດີໝົດ. ຂໍໃຫ້ຈະເລີນ ຈະເລີນເດີ. ອີ່ຕົນນ້ອງໆ ບໍ່ມີຫ້ອງຮຽນ ເພິ່ນໜ້າຮັກ ໜ້າຮັກ

ພ້ອມນີ້ ໃນໂພສດັ່ງກ່າວກໍມີຮູບພາບຂອງຫ້ອງຮຽນປັດຈຸບັນ ເຊິ່ງບໍ່ມີຝາແອ້ມ ຄືດັ່ງທີ່ອະທິບາຍໄວ້ ຮວມທັງແບບຕົວຢ່າງຂອງຫ້ອງຮຽນຫຼັງຈາກກໍ່ສ້າງສ້ອມແປງແລ້ວ ແລະ ລາຍລະອຽດຂອງໂຄງການ ແລະ ມູນຄ່າລວມເຊິ່ງຕ້ອງການກວ່າ 26 ລ້ານກີບ

ສຳລັບຜູ້ທີ່ສົນໃຈຮ່ວມປະກອບສ່ວນ ສາມາດຮ່ວມບໍລິຈາກໄດ້ຕາມລາຍລະອຽດຈາກໂພສຕົ້ນທາງລຸ່ມນີ້ ແລະ ສາມາດຕິດຕາມການອັບເດດຍອດການບໍລິຈາກໄດ້ທີ່ເຟສບຸກຂອງ ລູກນໍ້າ ທີ່ https://www.facebook.com/louknum.thidalat.94