ໂອລ້າ BlackEyes ຕອບໂຕ້ດ້ວຍສຽງເພງ ສອງລ້ານເປັນເຫດ ຫຼັງຖືກດ່າ “ໄປຕາຍ” ລາຄາຄ່າອັດເພງ 2 ລ້ານກີບ

ເປັນການຕອບໂຕ້ທີ່ເວົ້າໄດ້ວ່າສ້າງສັນຢ່າງສຸດໆສຳລັບໜຸ່ມ ໂອລ້າ BlackEyes ທີ່ເມື່ອບໍ່ດົນມານີ້ໄດ້ຖືກຜູ້ທີ່ສົ່ງມາຖາມລາຄາຄ່າອັດເພງ ແຕ່ເມື່ອຮູ້ລາຄາແລ້ວຊໍ້າພັດດ່າໂອລ້າດ້ວຍຄຳເວົ້າທີ່ຮຸນແຮງ ແລະ ບໍ່ສຸພາບ ເປັນເຫດໃຫ້ນັກຮ້ອງໜຸ່ມຄົນນີ້ໄດ້ອອກມາແຕ່ງເພງໃຫ້ເປັນກໍລະນີພິເສດ.

ໂອລ້າ ໄດ້ໂພສເພງດັ່ງກ່າວທີ່ຄາດກັນວ່າແຕ່ງແບບວ່ອງໄວທັນສະຖານະການ ລົງໃນເຟສບຸກສ່ວນຕົວເມື່ອວັນທີ 13 ກໍລະກົດ 2020 ພ້ອມທັງລະບຸຂໍ້ຄວາມຕິດຕະຫຼົກວ່າ “ຖ້າບໍ່ຖືກດ່າໃນມື້ນັ້ນ ກະຄືຊິບໍ່ໄດ້ຮ້ອງແບບນີ້. ຝາກກົດແຊຣ໌ໃຫ້ໄປຮອດໄປເຖິງ.” ເພງນີ້ແຕ່ງໂດຍ ອ້ຽງ ແລະ ເປົາ BlackEyes ສະມາຊິກຂອງວົງດັ່ງກ່າວເອງ.

ຍ້ອນກັບໄປເມື່ອວັນທີ 11 ກໍລະກົດ 2020, ໂອລ້າ ໄດ້ໂພສຮູບໜ້າຈໍແຊັດຈາກ WhatsApp ທີ່ມີຄົນສົ່ງມາຖາມລາຄາຄ່າອັດເພງ ແລ້ວໂອລ້າຕອບກັບໄປວ່າເພງໜຶ່ງ 2 ລ້ານກີບ ແຕ່ຊໍ້າພັດຖືກຜູ້ນັ້ນຕອບກັບມາຢ່າງຫຍາບຄາຍວ່າ “ໄປຕາຍ” ພ້ອມທັງດ່າອີກວ່າ “ພໍ່ມຶງຕາຍ” ເຊິ່ງພຶດຕິກຳດັ່ງກ່າວນີ້ໄດ້ຖືກວິພາກວິຈານຢ່າງໜັກໃນສື່ສັງຄົມອອນລາຍເຖິງຄວາມເໝາະສົມ ພ້ອມທັງບອກວ່າລາຄານີ້ແມ່ນຖືກຫຼາຍແລ້ວ ເພາະບາງບ່ອນເອົາແພງກວ່ານີ້ຫຼາຍ.

ສຳລັບເພງນີ້ ກໍຖືວ່າເປັນການຕອບໂຕ້ຂອງໜຸ່ມນັກຮ້ອງຄົນນີ້ທີ່ສ້າງສັນ ແລະ ສ້າງສຽງຫົວໄດ້ເປັນຢ່າງສູງ.