ປະຕິຫານມີຈິງ ເດັກຫາກໍ່ເກີດແລ້ວຢຸດຫາຍໃຈໄປແລ້ວ ແຕ່ທ່ານໝໍຊ່ວຍຊີວິດກັບຄືນມາໄດ້

ເປັນເລື່ອງລາວທີ່ສ້າງຄວາມຕົກໃຈ ຂະນະດຽວກັນກໍ່ສ້າງຄວາມດີໃຈ ແລະ ປະທັບໃຈໄປພ້ອມ ຈາກເຫດການທີ່ທີມກູ້ໄພເຂົ້າຊ່ວຍເຫຼືອແມ່ມານເກີດລູກຍາກ ເນື່ອງຈາກ ເດັກນ້ອຍເອົາທາງຕີນອອກມາກ່ອນ ຍິ່ງເຮັດໃຫ້ການເກີດໃນຄັ້ງນີ້ເພີ່ມຄວາມຍາກຂຶ້ນທະວີຄູນ ແຕ່ກູ້ໄພກໍ່ຊ່ວຍຈົນສຸດຄວາມສາມາດ ເຮັດໃຫ້ເດັກນ້ອຍອອກມາ ແຕ່ພົບວ່າບໍ່ໄຫ້ ແລະ ບໍ່ຊີບພະຈອນບໍ່ເຕັ້ນ ຈຶ່ງຮີບນໍາຕົວທັງແມ່ ແລະ ລູກສົ່ງໂຮງໝໍ

ເຊິ່ງຂໍ້ມູນຈາກ ຫນ່ວຍກູ້ໄພ ປະສານໃຈ ນະຄອນຫລວງວຽງຈັນ ໃຫ້ຮູ້ວ່າ ກໍລະນີແມ່ມານເກີດລູກຍາກໃນຄັ້ງນີ້ ທີມກູ້ໄພໄດ້ພະຍາມນໍາພວກກ່ຽວສົ່ງໂຮງໝໍ ແຕ່ຮອດກາງທາງ ລູກກໍ່ເກີດອອກມາໄດ້ ແຕ່ເດັກຄືບໍ່ມີອາການຮ້ອງໄຫ້ ພົບວ່າຊີບພະຈອນບໍ່ເຕັ້ນ,ບໍ່ຫາຍໃຈ ທາງກູ້ໄພເຫັນເເນວນັ້ນຈື່ງໃຫ້ອົກຊີເຈນ ກັບ ປໍ້າຫົວໃຈ ໃນຂະນະທີ່ເດີນທາງໄປສົ່ງໂຮງໝໍ ເມືອຮອດໂຮງຫມໍ ຈື່ງໃຫ້ທາງທ່ານຫມໍຊ່ວຍໃນການພື່ນຊີບເດັກນ້ອຍຜູ້ນັ້ນ

ໃນຕອນນັ້ນ ທ່ານຫມໍໄດ້ຊ່ວຍສຸດກຳລັງ ເເລະ ກໍ່ເປັນຜົນເດັກນ້ອຍ ມີການຫາຍໃຈເເລະຫົວໃຈເຕັ້ນມາເປັນປົກະຕິ ທາງເເມ່ ເເລະ ເດັກປອດໄພທັງຄູ່ ສົມເສີຍທີມເເພດທີມຫມໍ ເເລະ ອ້າຍນ້ອງກູ້ໄພ ທີ່ໄດ້ຊ່ວຍໃຫ້ການກຳເນີດນັ້ນຄັ້ງນີ້. ໂດຍເຫດການດັ່ງກ່າວເກີດຂຶ້ນເມື່ອວັນທີ 17 ພຶດສະພາ 2020 ທີ່ບ້ານ ໂນນສະຫວ່າງ ເມືອງ ໄຊເສດຖາ ນະຄອນຫຼວງວຽງຈັນ

ແນວໃດກໍ່ຕາມ ສຸດດີໃຈມີ່ທັງສອງແມ່ລູກປອດໄພ ແລະ ຍິນດີຕ້ອນຮັບນ້ອງນ້ອຍທີ່ກໍາລັງມືນຕາມາເບິ່ງໂລກ ເພີ່ມປະຊາກອນລາວຂຶ້ນມາອີກ 1 ຄົນ ແລະ ທີ່ສໍາຄັນຂໍຊົມເຊີຍກູ້ໄພທີ່ເຮັດວຽກຢ່າງມີສະຕິ ແລະ ວ່ອງໄວ ນໍາສົ່ງສອງແມ່ລູກເຂົ້າໂຮງໝໍ ໃຫ້ທ່ານໝໍຊ່ວຍຊີວິດທັງສອງຄົນໄວ້ໄດ້