ປະຫວັດຫຍໍ້ຕະຫລາດຕ່າງໆ ນະຄອນຫລວງພຣະບາງໃນອະດິດ ໃຫ້ລະນຶກຄິດຮອດຄິດເຖີງກັນອີກ

ມື້ນີ້ຈະຂໍອະນຸຍາດນຳເອົາຮູບພາບ ຂອງຕະຫລາດເຊົ້າຫລວງພຣະບາງ ໃນຍຸກປີ ຄສ 1970 , 1971 ແລະ 1973 ຮີບໂຮມມາໃຫ້ລະນຶກຄິດຮອດຄິດເຖິງກັນອີກ ພໍ່ເຖົ້າແມ່ເຖົ້າ ປູ່ຍ່າໃຜ ຫລືພໍ່ແມ່ໃຜ ທີເຄີຍໄປຕະຫລາດ ຄ້າຂາຍເຄື່ອງ ໄປຊື້ຂອງຢູ່ຂອງກີນເຄື່ອງໃຊ້ໄມ້ສ້ອຍ ເຄື່ອງອຸປະໂພກ-ບໍລິໂພກຕ່າງໆ ຢູ່ຕະຫລາດດັ່ງກ່າວ ມາໃຫ້ຫວນລະນຶກຄິດເຖິງກັນອີກຄັ້ງຫນຶ່ງ

ຕະຫລາດຢູ່ຕົວເມືອງຫລວງພຣະບາງ ນັບແຕ່ອະດິດ ມາຮອດຍຸກແຫ່ງການປົດປ່ອຍຊາດພໍຈະສະຫລຸບຫຍໍ້ໆ ມາໃຫ້ອ່ານກັນດັ່ງນີ້ :

– ຕະຫລາດທີເກົ່າແກ່ດັ່ງເດີມແທ້ໆຂອງຫລວງພຣະບາງ ນັ້ນກໍ່ແມ່ນຕະຫລາດທ່າເຮືອເມ ເພາະເປັນຕະຫລາດທີຈະນຳເອົາສິນຄ້າຕ່າງຈາກນອກເມືອງໃສ່ເຮືອມາຂາຍໃນຫລວງພຣະບາງ ໂດຍເຮືອທີຂົນສິນຄ້າມາຂາຍ ມາຊື້ເຄື່ອງກໍ່ຈະມາຈອດຢູ່ທ່າເຮືອເມແຫ່ງນີ້ ດັ່ງນັ້ນ ຕະຫລາດທ່າເຮືອເມຈຶ່ງເປັນຕະຫລາດເກົ່າແກ່ດັ່ງເດີມຂອງຫລວງພຣະບາງ

 

– ຕະຫລາດກາງເມືອງຫລວງພຣະບາງ ນັບແຕ່ 4 ແຍກຮ່ອມຕາດຫມໍ້ ໄປຮອດແຖວບ້ານເຈັກ ກໍ່ຈະມີການຊື້ຂາຍມີຮ້ານ ໃນບໍລິເວນດັ່ງກ່າວ ດັ່ງພວກເຮົາຈະເຫັນຮູບຖ່າຍຂາວດຳອາຍຸ 100 ກວ່າປີຜ່ານມານັ້ນ ຕະຫລາດດັ່ງກ່າວຈະຂາຍເຄື່ອງອຸປະໂພກເປັນຫລັກ ເຊັ່ນ ຫມໍ້ແຫກແຕກໂປະ ( ຫມໍ້ ຖວາຍຈານ ເຄື່ອງໃຈຕ່າງໆ ຈາກດິນ ຈະຖືກປັ້ນຂຶ້ນທີບ້ານພັນຫລວງ ຊາວບ້ານແຖວນັ້ນກໍ່ຈະຂົນເຄື່ອງດັ່ງກ່າວຂ້າມຂົວໄມ້ໄຜ່ນ້ຳຄານ ເພື່ອມາຂາຍແຄມທາງ ຮ່ອມນັ້ນຈະໄດ້ຊື່ວ່າ ຮ່ອມຕາດຫມໍ້ມາຮອດທຸກມື້ນີ້

 

– ຕະຫລາດລາດແລງໃຕ້ ແມ່ນຕັ້ງຢູ່ລານເດິ່ນຕະຫລາດກາງຄືນຫລວງພຣະບາງ ປະຈຸບັນນີ້ ( 4 ແຍກໂຮງແຊກ ) ເຊິ່ງເປັນຕະຫລາດເກົ່າແກ່ ເພາະຈະເປີດຂຶ້ນໃນຕອນແລງ ໂດຍຈະຂາຍເຄື່ອງອຸປະໂພກ-ບໍລິໂພກ ປັດຈຸບັນນີ້ເປັນລານເດິ່ນໄວ້ສາຍເທດສະການຮູບເງົາ ຂາຍເຄື່ອງແຜ່ນແພ ຫັດຖະກຳຈາກບ້ານຕ່າງ ເຊັ່ນບ້ານຜານົມ ເຄື່ອງແຜ່ນແພຈາກເຜົ່າມົ້ງ ເຜົ່າລື້

ຕະຫລາດລາດແລງເໜືອ ແມ່ນຕັ້ງຢູ່ແຄມຄານ ບ້ານຫລັກຄຳ ( ບ້ານວັດແສນ ) ຈະຂາຍເຄື່ອງກິນເປັນຫລັກ ປັດຈຸບັນນີ້ບໍ່ມີແລ້ວ ແລະທີສຳຄັນຂອງບົດນີ້ ກໍ່ແມ່ນຕະຫລາດເຊົ້າ ນີ້ເອງ

 

ຕະຫລາດເຊົ້າແຫ່ງນີ້ເມື່ອກ່ອນນັ້ນດິນໃນບໍລິເວນນີ້ເປັນດິນຂອງສະເດັດອົງມຸງກຸດ ແລະດິນຂອງວັດຮ່າຢອງ ( ຂາມຢ່ອງ ) ຊື່ວັດດັ່ງກ່າວເປັນຊື່ວັດຂອງຄົນທີສ້າງວັດແຫ່ງນີ້ ເຊິ່ງເປັນຄົນຫໍ້ ມາສ້າງຖວາຍຂຶ້ນດັ່ງນັ້ນຈຶ່ງໃສ່ຊື່ວັດແຫ່ງນີ້ວ່າວັດຮ່າຢອງ ແລ້ວພ້ຽນເປັນຂາມຢ່ອງ ຕົກມາຮອດປະມານປີ ຄສ 1957 ຈຶ່ງໄດ້ເກີດເປັນຕະຫລາດເຊົ້ານີ້ຂຶ້ນ ຈົນມາຮອດປະມານປີ ຄສ 1989-1992 ຕະຫລາດແຫ່ງນີ້ຊຸດໂຊມຫລາຍ ຈຶ່ງຈະມີໂຄງການບູຣະນະຄືນ ຈຶ່ງໄດ້ຍ້າຍຕະຫລາດເຊົ້າແຫ່ງນີ້ໄປຂາຍຊົ່ວຄາວ ທີລານເດິ່ນຫນ້າວັດພຣະບາດໃຕ້ ໄດ້ປະມານ 3-4 ປີ

 

ແຕ່ຜູ້ຂ້າບໍ່ຈື່ປີວ່າປີໃດແທ້ ເພາະສະຖານທີລານເດິ່ນວັດພຣະບາດໃຕ້ ແຫ່ງນີ້ຄັບແຄບຫລາຍ ເພິ່ນຈຶ່ງຍ້າຍໄປຕັ້ງຢູ່ລານເດິ່ນຫໍພິພິຕະພັນເຈົ້າສຸພານຸວົງ ໃນປັດຈຸບັນນີ້ ເຊິ່ງເມື່ອກ່ອນເອີ້ນວ່າຕະຫລາດນາວຽງຄຳ ໄດ້ຫລາຍປີເຕີບ ເພິ່ນກໍ່ຫຍຸບຕະຫລາດດ່ັ່ງກ່າວ ແລ້ວຜູ້ຄົນກໍ່ມາຂາຍຢູ່ຕະຫລາດເຊົ້າແຫ່ງນີ້ ແລະໄດ້ຊື່ໃຫມ່ວ່າ ຕະຫລາດດາຣາ ຈົນມາຮອດທຸກມື້ນີ້. ເຊິ່ງຂໍ້ມູນດັ່ງກ່າວ ປີທີກ່າວເຖິງອາດຈະຜິດພາດ ເພາະເມື່ອກ່ອນຜູ້ຂ້າບໍ່ໄດ້ຈົດປີໄວ້ ອາໄສຈື້ຈຳຊື່ໆ ທ່ານໃດ ຜູ້ທີຮູ້ກະຣຸນາຊ່ອຍບອກກ່າວ ເພື່ອຈະເຮັດບົດຄວາມນີ້ສົມບູນຍຶ່ງໆຂຶ້ນ

ຂອບໃຈຮູບພາບຈາກ : ຄະນະຂອງສຳນັກຝຣັ່ງເສດ ແຫ່ງປາຍບູຣະພາທິດ (EFEO ຮີບໂຮມໂດຍເພຈ : ນະຄອນຫລວງພຣະບາງ Luangprabang City